Sarreneko eskola publikoan laguntzen ari gara, bertako haurren hezkuntza-baldintzak hobetzeko. Eskola honek 110 ikasle ditu eta lehen hezkuntza eskaintzen du. Gure helburua da ikasleek ingurune seguru eta egoki batean ikastea, eta horretarako hainbat hobekuntza egin ditugu.

Azpiegitura hobetzen

Eskolako eraikina egoera hobean egon dadin, ateak eta leihoak konpondu ditugu, eta leihoetan berjak jarri ditugu, hauek kolpeekin ez apurtzeko eta ikasgelak seguruagoak izateko. Bestalde, lurzorua berritu dugu baldosak jarriz, izan ere, haur gehienak txankletan ibiltzen dira, eta lurra apurtuta zegoenez, askok zauriak izaten zituzten. Horiei behar bezala erantzun ezean, osasun-arazoak sortzen zitzaizkien.

Horrez gain, ikasgelako hormak margotu ditugu eta komunak eraiki ditugu, eskolaren azpiegitura hobetzeko.

Jolas-eremuak eta berdintasuna sustatzen

Eskolan, neskek jolasteko espazio oso gutxi zuten, futbolean aritzen ziren mutilek espazio guztia hartzen zutelako. Hori dela eta, saskibaloi kantxa bat eraiki dugu, neskek ere kirola egiteko aukera izan dezaten. Orain, neskek eta mutilek elkarrekin jokatzen dute saskibaloian, eta berdintasuna sustatzeko pauso garrantzitsua izan da.

Horrez gain, Lointek Gernikak saskibaloiko arropa eman digu, ikasleek kirola egiteko beharrezko ekipamendua izan dezaten.

Uraren hornidura errazten

Eskolako ikasleen eta herritarren ur-hornidura hobetzeko, Barrutialde Institututik eskolan zegoen putzutik ura ateratzeko makina bat jaso dugu eta instalatu dugu. Ordura arte, ura baldeka ateratzea lan fisiko handia eskatzen zuen, eta askorentzat zaila egiten zen. Makina honi esker, ura ateratzeko lana askoz errazagoa eta eraginkorragoa bihurtu da. Gaur egun, ikasleek bertatik edaten dute ura, eta inguruko herritar askok ere putzu honetatik ura hartzen dute.

Hezkuntza eta formazioa indartzen

Hezkuntza arloan ere ekarpenak egin ditugu: gaztelaniazko eskolak eman ditugu eta hainbat formazio antolatu ditugu. Besteak beste:
✔️ Ingurumenarekin lotutako formazioak
✔️ Begietako gaixotasun bat prebenitzeko prestakuntza

Guzti hau gure bazkideen eta laguntzaileen ekarpenari esker posible izan da. Hezkuntzaren bidez, berdintasuna sustatuz eta oinarrizko baliabideak eskainiz, etorkizun hobe bat eraikitzen jarraituko dugu!